Act 16 | KMG | STEP | Paulo â Sila jahe raku Derebe â Listera haeo fisipic. Eme Listera haeo ira Jesure qâjâpec moc juwec šâŋene Timoteo. E neŋgoc-ticne Juda ŋokac opâ ruac â mamac-ticne Grikŋic.

Acts 16

Paulo e Listera haeo Timoteo motec-ticne bawec

1 Paulo â Sila jahe raku Derebe â Listera haeo fisipic. Eme Listera haeo ira Jesure qâjâpec moc juwec šâŋene Timoteo. E neŋgoc-ticne Juda ŋokac opâ ruac â mamac-ticne Grikŋic. 2 Listera â Ikonioŋ haeonec miti mamana jaŋe Timoteore fuŋne muafeckehuc Paulo âzâcnembiŋ. 3 Âzâcnepie Paulo e jume ju eocte âzâcnewec. Eme mâreŋ ira Judaŋic jurambiŋ jaŋe motecte mamac e Grikŋic i mana-fârembiŋ. Irec Paulozi jaŋere erâ sahacnao Mosere ma bawec. 4 Eme hae sâc rahuc, aposolo â micne Jerusalem haeo mumupaŋ mumbiŋ, i reŋkeniŋte opâ ruac jaza rapic. 5 Iŋuc ehuc gie bapire Jesure kikefuŋ jaŋere mamanasiŋ ɋârâŋkewec â šoaŋ sâc qâpuczi jaŋerao ra heacmârec ekupie bocjaha embiŋ.

Paulo maŋne ŋerisieme Makedonia ŋic moc honewec

6 Eme Asia mâreŋko miti murazo mupie Tiri Mârozi hecke-jareme Frigia â Galatia mâreŋ fotâcnehuc rambiŋ. 7 Raku Misia mâreŋ qaŋeŋnao fisirâ ŋifec bâŋorierâ Bitinia mâreŋko razo mupie Jesure Mârozi iŋuc jaha mi mana-jarewec. 8 Irec jaŋe Misia mâreŋ qacnerâ raku hâwecmecko Troa haeo fisimbiŋ. 9 Ira fisirâ ŋafeo Paulo e maŋnezi ŋerisieme wiac kecšiŋuc honewec: Makedonia ŋic moczi erao fuarâ domahuc mu wâsic ecnehuc šiŋuc âzâcnewec: “Go Makedonia mâreŋko fârâ bafic-nâpozemec.” 10 Paulo e wiac i honeme šiŋuc mumbeŋ: “Anutu e Makedonia mâreŋko ra Biŋebiaŋ jazanaŋte munârekac hâcne.” Iŋuc murâ izia ranaŋte šawiembeŋ.

Qoruc situâc rune Lidia

11 Ʒawierâ wokeo ferâ Troa hae beherâ fofotâc raku Samotrake nucko fisimbeŋ. Hae fureme irecnec raku Neapoli haeo fisimbeŋ. 12 Ira wokeonec waharâ raku Filipi haeo fisimbeŋ. I Makedonia mâreŋ irec hae sâko moc, Romaŋic jaŋe hae rune erâ jumbiŋ. Hae ira šoaŋ gâcnao jukupene 13 sabata hombaŋ maickeme hae upeo opâ moc fowec ira šiŋuc muhuc humbeŋ: “Judaŋic numueŋgopieŋ irec toma opâo moc fokacko hurâ honenaŋ.” Iŋuc muhuc hurâ ŋokac tumaŋnerâ juhapie bâfuac-joparâ waha ŋehuc miti jazambeŋ. 14 Eme jaŋere guruo ŋokac moczi Anutu araŋ bacnehuc juwec, šâŋene Lidia, e qoruc situâc rune, Tiatira haeonec. Ŋokac e hâcne Wofuŋzi maŋne bâuŋtome Paulole dâŋ hazec hâric manawec. 15 Erâ e jahacne â wiacfâc-ticne Miti Opâ ruarâ šiŋuc nâzâwec: “Ŋoŋe honecnupie Wofuŋte biŋe ekopacko nore ficko wefurâ ŋeŋe juju enšepieŋ.” Iŋuc muhuc hotâ-nâreme fembeŋ.

Paulo â Sila faŋfaŋte erâ kâpâcwâru ficko râec-jofambiŋ

16 Dameŋ mocko nunumure tomao huhapene kiŋaŋ naru moczi bâfuac-nâpowec. Naru e faŋfaŋ demoŋ-ticnehec juhuc ŋic jaŋere fuŋne mufua jujec, ehuc rufâc-ticne moneŋ mafa bocjaha hure-jare jujec. 17 Eme eki hâcne bâfuac-nâporâ Paulo â nâŋe bâjâpec-nâpohuc dâŋ wiwira kecšiŋuc ewec: “Ŋic kecšizi Anutu femicne sâko ere kiŋaŋ qaqa juhuc biaŋkeniŋte hata mušâwe-ŋareeŋgopieŋ.” 18 Dâŋ wiwira i sasawa šoaŋne šoaŋne enarekume Paulo e irec takickeme forisierâ demoŋ šiŋuc âzâcnewec: “No Jesu Kristo ere micte gazape ŋokacte maŋkonec wefu rac.” Iŋuc mume izia wefurâ rawec.

19 Eme naru rufâc-ticne jaŋe moneŋ mafa fufua-jeŋic arictac eme manarâ Paulo â Sila rocjofarâ 20 hae šâšâŋiŋko kia jaŋerao fârec-jofa rarâ qoric-jofahuc šiŋuc mumbiŋ: “Jahe Judaŋiczi hae-nâŋecko warerâ maŋbâiŋ enârekopirec, 21 ehuc mâsi qâreŋ furune, Romaŋiczi mi eene â mi babajune, i hâcne bâfuakopirec.” 22 Eme ŋic guru sâko domambiŋ jaŋe aaric mana-jactehuc râsi šâŋe honec-jofapie kiazi ŋaqi-jekic heuc qâunuckerâ mume kâcbiŋzi jofambiŋ. 23 Kâcbiŋzi mâretec qâtâc bâtâc-jofarâ kâpâcwâru ficko râec-jofarâ soŋaŋ e motâc basanaŋkerâ aimuŋ soŋaŋ-jofaocte âzâcnembiŋ. 24 Âzâcnepie kâpâcwâru fic maŋne šâšâŋiŋko râec-jofarâ kike-jekic jâc fifitacko ŋeme kindeŋneme fopic.

Kâpâcwâru ficsoŋaŋzi Miti Opâ ruawec

25 Ŋafe šâšâŋiŋko Paulo â Sila jahe Anutu gae nunumu ecnehuc muteŋkepic. Epire kâpâcwâru ŋic gâcnezi micfânâŋ-jekic manambiŋ. 26 Ehame homeŋ sâko ututuŋ bame kâpâcwâru fic sâpene qiriŋ qame motâc aŋke-fârewec â ŋic sasawa kâpâcwâru-jeŋic ŋeŋgoroŋkewec. 27 Eme kâpâcwâru ficsoŋaŋzi guŋkonec mana ɋâɋârerâ faharerâ motâc aaŋ doma-fâreme honerâ, kâpâcwâru ŋic wise-fârembieŋ muhuc sâqe-ticne becsahackonec unuckerâ sahac-ticne âeckezo ewec. 28 Iŋuc ezo eme Paulozi owackerâ muwec, “Sahacge mi sipirickec, nâŋe furu jaha ŋeŋgopeneŋ.” 29 Eme soŋaŋ e lambere mume wiacfâcne jaŋe râcnepie ficmaŋko ferâ ɋarac ɋarac qahuc Paulo â Sila jahere kikefuŋko fodapewec. 30 Erâ ficmaŋkonec jowacjofa waharâ wio-jacterâ muwec, “Ŋicbomboŋ jahec-nane, no weniŋuc erâ biaŋkepemu?” 31 Eme jahe šiŋuc âzâcnepic: “Wofuŋ Jesu Kristo manasiŋkehuc go â wiacfâcge biaŋkeniŋmu.” 32 Iŋuc murâ e â wiacfâcne Wofuŋte dâŋ jazapic. 33 Jazapire soŋaŋzi ŋafeoa hefârec-jofarâ kâcbiŋ micrâfâcne šure-jactewec. Erâ mume e jahacne â wiacfâcne Miti Opâ rua-jarepic. 34 Eme e jahacne ficmaŋko râec-jofarâ mume nânâ rike bâmoc ejactembiŋ. Eme e â wiacfâcne Anuture biŋe embiŋte bujeŋic biaŋkewec.

Paulo â Sila jahe kiazi mume kâpâcwâru fickonec wahapic

35 Hae fureme kia jaŋe polismaî šiŋuc muhuc jaza sorec embiŋ: “Ŋic jahec firuec-jofazo.” 36 Eme soŋaŋzi manarâ Paulo šiŋuc âzâcnewec: “No sorec-ŋofape ranicte kia jaŋe dâŋ râepie warekac, irec ŋohe waha rarâ wamao juzepirec.” 37 Mume Paulozi šiŋuc âzâcnewec: “Jaŋe Romaŋic guruonec fuakicne nâhe dâŋficko mi râec-nâfohuc ŋichofao qâtâc bâtâc-nâforâ kâpâcwâru ficko râec-nâfombieŋ. Eme ši wemocte kamicnea sorec-nâfoŋgopieŋ? Iŋuc aricne, jaŋac ware jowac-nâfopie razeperec.” 38 Paulo e dâŋ iŋuc mume polismaî jaŋe risie rarâ kia jazapie jaŋe ŋic jahec Romaŋic guruo fuakicne biŋe i manarâ fâfârembiŋ. 39 Fâfârerâ ŋic jaherao warerâ mu bâmiriŋ ejacterâ kâpâcwâru fickonec jowac-jofa waharâ hae-jeŋic beherâ ranicte jasambiŋ. 40 Eme jahe kâpâcwâru fickonec waharâ Lidia ere ficko rarâ Jesure kikefuŋ honec-joparâ mu sawaŋ ejarerâ rapic.